హైదరాబాద్‌ గచ్చిబౌలిలో H-CITI ప్రాజెక్ట్‌ పనులు వేగం పుంజుకున్నాయి. IIIT జంక్షన్‌, ఖాజాగూడ ప్రాంతాల్లో ఫ్లైఓవర్లు, అండర్‌పాస్‌ నిర్మాణ పనులను సైబరాబాద్ మున్సిపల్ కార్పొరేషన్ (CMC) వేగవంతం చేసింది. గచ్చిబౌలి జంక్షన్‌లో భూగర్భ తవ్వకాలు దాదాపు పూర్తికాగా, మొత్తం సివిల్‌ పనుల్లో సుమారు 40 శాతం పూర్తయినట్లు అధికారులు తెలిపారు.ఈ ప్రాజెక్టులో 3 ఫ్లైఓవర్లు, ఒక 6-లేన్ ద్విదిశ అండర్‌పాస్‌ నిర్మిస్తున్నారు. మొత్తం 3.3 కిలోమీటర్ల నెట్‌వర్క్‌లో పనులు కొనసాగుతున్నాయి. రోజుకు 2 లక్షలకు పైగా వాహనాలు ప్రయాణించే ఈ ప్రాంతంలో ట్రాఫిక్‌ రద్దీ తగ్గించేందుకు ప్రాజెక్టును చేపట్టారు. పనులను 2027 ఏప్రిల్‌, మే నాటికి పూర్తి చేయాలని CMC లక్ష్యంగా పెట్టుకుంది.
