-
హైదరాబాద్ గేటెడ్ కమ్యూనిటీలకు TG-RERA కీలక మార్గదర్శకాలు
హైదరాబాద్‌తో పాటు తెలంగాణలోని గేటెడ్ కమ్యూనిటీలు, అపార్ట్‌మెంట్లలో మెయింటెనెన్స్ ఛార్జీలపై వివాదాలకు చెక్ పెట్టేలా TG-RERA కీలక మార్గదర్శకాలు జారీ చేసింది. ప్రాజెక్ట్ పూర్తై Occupancy Certificate పొందిన తర్వాత లేదా మెజారిటీ ఫ్లాట్ల రిజిస్ట్రేషన్లు పూర్తయిన వెంటనే నిర్వహణ బాధ్యతలను రెసిడెంట్స్ వెల్ఫేర్ అసోసియేషన్‌ (RWA)కు అప్పగించాలని స్పష్టం చేసింది. హ్యాండోవర్ పూర్తయ్యే వరకు మాత్రమే ఒప్పందం ప్రకారం బిల్డర్ మెయింటెనెన్స్ వసూలు చేయాలి. RWA ఏర్పాటైన తర్వాత అదనపు ఛార్జీలు విధించరాదు. అలాగే కార్పస్ ఫండ్ వివరాలు, మూడేళ్ల మెయింటెనెన్స్ ఆడిట్ నివేదికలను కొనుగోలుదారుల సంఘానికి అప్పగించాలి. అనుమతి లేని లేఅవుట్లు, TG-RERA రిజిస్ట్రేషన్ లేని ప్రాజెక్టుల విక్రయాలపై జరిమానాలు, క్రిమినల్ చర్యలు తీసుకుంటామని RERA హెచ్చరించింది.
-
ఫ్లాట్ ఇవ్వకుండా ఆరేళ్లు ఆలస్యం.. ఆదిత్య కన్‌స్ట్రక్షన్స్‌కు TG RERA షాక్
హైదరాబాద్‌లో ఫ్లాట్ కొనుగోలుదారుడికి తెలంగాణ RERA (TG RERA) కీలక తీర్పు ఇచ్చింది. శేరిలింగంపల్లి మండలంలోని ఆదిత్య క్యాపిటల్ హైట్స్ ప్రాజెక్టులో ఫ్లాట్ కోసం మోతిపల్లి వంశీధర్ 2018లో రూ.1.02 కోట్లకు ఒప్పందం చేసుకుని, రూ.85,55,367 చెల్లించారు. అయితే ఆరేళ్లు గడిచినా ఫ్లాట్ నిర్మించి అప్పగించకపోవడంతో ఆయన TG RERAను ఆశ్రయించారు. విచారణ అనంతరం, చెల్లించిన రూ.85.55 లక్షలను 10.75% వార్షిక వడ్డీతో తిరిగి చెల్లించాలని RERA ఆదేశించింది. మానసిక క్షోభ, ఫిర్యాదు ఖర్చుల కోసం అదనంగా రూ.1 లక్ష పరిహారం చెల్లించాలని పేర్కొంది. ఈ మొత్తాన్ని ఆదేశాల తేదీ నుంచి 60 రోజుల్లోపు చెల్లించాలని సంస్థకు గడువు విధించింది.
-
ఆరేళ్లుగా ఫ్లాట్ కోసం ఎదురుచూపులు.. రూ.1.20 లక్షల పరిహారం
హైదరాబాద్ హఫీజ్‌పేట్‌లోని ఆదిత్య క్యాపిటల్ హైట్స్ ప్రాజెక్టులో ఫ్లాట్ కొనుగోలు చేసిన అమెరికాలో నివసిస్తున్న వంశీధర్ మోతిపల్లి ఆరేళ్లుగా స్వాధీనం కోసం ఎదురుచూస్తున్నారు. 2018 మార్చి 23న 11వ అంతస్తులో 2,125 చదరపు అడుగుల ఫ్లాట్‌ను రూ.1.02 కోట్లకు కొనుగోలు చేసేందుకు ఒప్పందం చేసుకున్నారు. ఇప్పటివరకు రూ.85.55 లక్షలు చెల్లించినప్పటికీ ఫ్లాట్ అప్పగించలేదని TG-RERAను ఆశ్రయించారు. ఆక్యుపెన్సీ సర్టిఫికెట్‌ ఆలస్యం కూడా సమస్యగా మారిందని ఫిర్యాదులో పేర్కొన్నారు. ఈ కేసును పరిశీలించిన TG-RERA రూ.1 లక్ష మానసిక వేదనకు, రూ.20,000 న్యాయ ఖర్చులకు కలిపి మొత్తం రూ.1.20 లక్షల పరిహారం చెల్లించాలని ఆదేశించింది. 60 రోజుల్లో చెల్లించకపోతే 10% వార్షిక వడ్డీ వర్తిస్తుందని స్పష్టం చేసింది.
-
సోషల్ మీడియాలో రియల్ ఎస్టేట్ మోసాలు.. RERA హెచ్చరిక
సోషల్ మీడియా వేదికగా జరుగుతున్న రియల్ ఎస్టేట్ మోసాలపై RERA అధికారులు అప్రమత్తమయ్యారు. ఫేస్‌బుక్, ఇన్‌స్టాగ్రామ్, యూట్యూబ్‌లో తక్కువ ధరకే ప్లాట్లు, విల్లాలు అంటూ ఆకర్షణీయమైన ప్రీలాంచ్ ఆఫర్లతో కొందరు మోసాలకు పాల్పడుతున్నట్లు అధికారులు గుర్తించారు. సరైన అనుమతులు, లేఅవుట్ ఆమోదాలు లేకుండానే ప్రాజెక్టులను ప్రచారం చేసి ముందస్తు డబ్బులు వసూలు చేస్తున్న ఘటనలపై నిఘా పెంచారు. నకిలీ రియల్ ఎస్టేట్ ప్రకటనలపై సైబర్ సెల్ సహకారంతో చర్యలు తీసుకుంటున్నారు. నిబంధనలు ఉల్లంఘించే సంస్థలపై జరిమానాలతో పాటు క్రిమినల్ కేసులు నమోదయ్యే అవకాశం ఉందని హెచ్చరించారు. ప్రజలు సోషల్ మీడియా ప్రకటనలను గుడ్డిగా నమ్మకుండా, పెట్టుబడి పెట్టే ముందు ప్రాజెక్ట్‌కు సంబంధించిన RERA రిజిస్ట్రేషన్ నంబర్, అనుమతులను అధికారిక పోర్టల్‌లో తప్పనిసరిగా తనిఖీ చేసుకోవాలని అధికారులు సూచించారు.
-
హామీ ఇచ్చిన సౌకర్యాలు లేకపోతే ఇంటి కొనుగోలుదారులు ఏం చేయాలి?
ప్రాజెక్ట్‌లో హామీ ఇచ్చిన సౌకర్యాలు (Amenities) అందుబాటులో లేకపోతే ఇంటి కొనుగోలుదారులు తమ హక్కులను కాపాడుకునేందుకు చర్యలు తీసుకోవచ్చు. రియల్ ఎస్టేట్ (రెగ్యులేషన్ అండ్ డెవలప్‌మెంట్) చట్టం, 2016 (RERA) ప్రకారం, కొనుగోలుదారులకు ప్రాజెక్ట్‌లో వాగ్దానం చేసిన సౌకర్యాలకు సంబంధించిన సమాచారాన్ని పొందే హక్కు ఉంది.ముందుగా బ్రోచర్, ఒప్పంద పత్రాలు, ప్రకటనలు వంటి అన్ని ఆధారాలను భద్రపరచాలి. సౌకర్యాలు అందుబాటులో లేవని చూపించే ఫొటోలు, వీడియోలను కూడా సేకరించాలి. అనంతరం డెవలపర్‌కు లిఖితపూర్వకంగా ఫిర్యాదు చేయాలి. సమస్య పరిష్కారం కాకపోతే సంబంధిత రాష్ట్ర RERA అథారిటీని లేదా తగిన వినియోగదారుల ఫోరమ్‌ను ఆశ్రయించవచ్చు.
-
ఉత్తరప్రదేశ్‌లో రియల్ ఎస్టేట్‌కు ఊతం.. 12 ప్రాజెక్టులకు UP RERA గ్రీన్ సిగ్నల్
ఉత్తరప్రదేశ్‌లో రియల్ ఎస్టేట్ రంగానికి ఊతమిచ్చేలా UP RERA 12 కొత్త ప్రాజెక్టులకు అనుమతులు మంజూరు చేసింది. ఆరు జిల్లాల్లో చేపట్టనున్న ఈ ప్రాజెక్టుల మొత్తం అంచనా పెట్టుబడి రూ.1,663.85 కోట్లు. వీటి ద్వారా 3,090 నివాస, వాణిజ్య యూనిట్లు అందుబాటులోకి రానున్నాయి. లక్నోలో నాలుగు ప్రాజెక్టులకు రూ.609.35 కోట్లు, ఘజియాబాద్‌లో మూడు ప్రాజెక్టులకు రూ.605.06 కోట్లు పెట్టుబడి రానుంది. హాపూర్, అయోధ్య, ప్రయాగ్‌రాజ్, కాన్పూర్‌లలోనూ ప్రాజెక్టులకు అనుమతులు లభించాయి. నిర్మాణ కార్యకలాపాలు, అనుబంధ రంగాల్లో అవకాశాలు పెరగడంతో పాటు, ప్రాజెక్టుల సకాలంలో పూర్తి చేయడం, హోమ్‌బయ్యర్ల ప్రయోజనాల పరిరక్షణపై UP RERA దృష్టి పెట్టనుంది.
-
రియల్ ఎస్టేట్‌లో RERAతో పారదర్శకత.. కానీ మరిన్ని సంస్కరణలు అవసరం
రియల్ ఎస్టేట్ రంగంలో RERA అమలుతో పారదర్శకత, నమ్మకం పెరిగాయని CREDAI-NCR అధ్యక్షుడు విశాల్ గుప్తా తెలిపారు. అయితే, ఇళ్ల ధరలు అందుబాటులో ఉండాలంటే అనుమతుల్లో జాప్యం, రెగ్యులేటరీ కంప్లయన్స్, పన్నుల భారాన్ని తగ్గించాల్సిన అవసరం ఉందన్నారు. ముఖ్యంగా బిల్డింగ్ ప్లాన్ అనుమతులు, RERA రిజిస్ట్రేషన్లలో ఆలస్యం, హౌసింగ్ ప్రాజెక్టుల వ్యయాన్ని పెంచుతోందని పేర్కొన్నారు. అలాగే నైపుణ్యం కలిగిన కార్మికులు, నాణ్యమైన కాంట్రాక్టర్ల కొరతతో నిర్మాణ ఖర్చులు పెరుగుతున్నాయని తెలిపారు. చౌకైన మూలధనం, భూమి లభ్యత, సులభమైన వ్యాపార విధానాలు పెరిగితే అఫోర్డబుల్ హౌసింగ్ సరఫరా మెరుగుపడుతుందని గుప్తా అన్నారు.
-
రేరా రిజిస్ట్రేషన్‌కు ముందే బుకింగ్స్.. జనప్రియ ప్రాజెక్ట్స్‌కు రూ.32.17 లక్షల జరిమానా
రేరా రిజిస్ట్రేషన్ పూర్తికాకముందే ప్రాజెక్టుల్లో బుకింగ్స్ చేపట్టినందుకు జనప్రియ ప్రాజెక్ట్స్‌కు అధికారులు రూ.32.17 లక్షల జరిమానా విధించారు. రియల్ ఎస్టేట్ ప్రాజెక్టులను రేరా నిబంధనలకు అనుగుణంగా నమోదు చేసిన తర్వాతే విక్రయాలు, బుకింగ్స్ చేపట్టాల్సి ఉంటుంది. అయితే రిజిస్ట్రేషన్‌కు ముందే బుకింగ్స్ నిర్వహించినట్లు గుర్తించడంతో సంబంధిత సంస్థపై చర్యలు తీసుకున్నట్లు సమాచారం. ఈ ఘటనతో హైదరాబాద్ రియల్ ఎస్టేట్ రంగంలో RERA నిబంధనల అమలు, ప్రాజెక్ట్ రిజిస్ట్రేషన్ ప్రాధాన్యత మరోసారి చర్చనీయాంశమైంది. కొనుగోలుదారులు ప్రాజెక్ట్ రేరా రిజిస్ట్రేషన్ వివరాలను పరిశీలించిన తర్వాతే బుకింగ్ చేసుకోవాలని నిపుణులు సూచిస్తున్నారు.
-
భూమి కొనుగోలు చేయని సొసైటీపై RERA ఫిర్యాదు చెల్లదు: ట్రిబ్యునల్ తీర్పు
భూమిని కొనుగోలు చేసి ప్రాజెక్ట్‌ను ప్రారంభించని సహకార సొసైటీపై RERA చట్టం కింద దాఖలైన ఫిర్యాదును విచారించే అధికారం లేదని ట్రిబ్యునల్ స్పష్టం చేసింది. సొసైటీ అభివృద్ధి కోసం భూమిని సేకరించకపోవడంతో ఎలాంటి రియల్ ఎస్టేట్ ప్రాజెక్ట్ ఉనికిలోకి రాలేదని పేర్కొంది. సుప్రీంకోర్టు Newtech, బాంబే హైకోర్టు Macrotech తీర్పులను ట్రిబ్యునల్ ప్రస్తావించింది. RERA చట్టంలోని సెక్షన్ 3 ప్రకారం ప్రాజెక్ట్ రిజిస్ట్రేషన్ అవసరమా, మినహాయింపు ఉందా అనే విషయాన్ని ముందుగా పరిశీలించాల్సి ఉంటుందని తెలిపింది.ఫిర్యాదుదారు డబ్బు రికవరీ కోసం సహకార సంఘాల రిజిస్ట్రార్ లేదా వినియోగదారుల ఫోరమ్‌ను ఆశ్రయించవచ్చని సూచించింది. సొసైటీ 6% వడ్డీతో డబ్బు తిరిగి చెల్లించేందుకు చేసిన ప్రతిపాదనను ఫిర్యాదుదారు అంగీకరించలేదు. చివరకు అప్పీల్‌ను కొట్టివేస్తూ ట్రిబ్యునల్ RERA ఉత్తర్వును సమర్థించింది.
-
వ్యవసాయ భూమి పేరుతో ప్లాట్ల విక్రయం చెల్లదు: రేరా ట్రిబ్యునల్ కీలక తీర్పు
వ్యవసాయ భూమిని లేఅవుట్ చేసి ప్లాట్లుగా విక్రయించాలంటే రేరా రిజిస్ట్రేషన్ తప్పనిసరి అని రేరా అప్పిలేట్ ట్రిబ్యునల్ స్పష్టం చేసింది. పట్టాదారు పాస్‌బుక్‌లో వ్యవసాయ భూమిగా నమోదైనప్పటికీ, భూమిని ప్లాట్లుగా విభజించి అంతర్గత రహదారులు, డ్రైనేజీ, ఇతర మౌలిక వసతులు కల్పిస్తూ విక్రయిస్తే అది రియల్ ఎస్టేట్ ప్రాజెక్టుగా పరిగణించబడుతుందని తెలిపింది.వికారాబాద్ జిల్లా మర్రిగూడ మండలం తుమ్మనపల్లి గ్రామంలో ‘హైటెక్ అవెన్యూ’ పేరుతో చేపట్టిన వెంచర్ వ్యవహారంపై విచారణ సందర్భంగా ట్రిబ్యునల్ ఈ తీర్పు వెలువరించింది. వ్యవసాయ భూమి పేరుతో రేరా నిబంధనలను తప్పించుకోవడం సాధ్యం కాదని స్పష్టం చేసింది.రేరా రిజిస్ట్రేషన్ లేకుండా ప్రాజెక్టు మార్కెటింగ్, బుకింగ్, ప్లాట్ల విక్రయాలు చట్టవిరుద్ధమని పేర్కొంది. ఎస్క్రో ఖాతాలో నిధులు ఉన్నప్పటికీ రేరా రిజిస్ట్రేషన్ నుంచి మినహాయింపు లభించదని తెలిపింది.రాష్ట్రవ్యాప్తంగా వ్యవసాయ భూముల పేరుతో నిర్వహిస్తున్న లేఅవుట్ వెంచర్లను గుర్తించి తగిన చర్యలు తీసుకోవాలని రేరా అధికారులను ట్రిబ్యునల్ ఆదేశించింది.
