సోషల్ మీడియా వేదికగా జరుగుతున్న రియల్ ఎస్టేట్ మోసాలపై RERA అధికారులు అప్రమత్తమయ్యారు. ఫేస్‌బుక్, ఇన్‌స్టాగ్రామ్, యూట్యూబ్‌లో తక్కువ ధరకే ప్లాట్లు, విల్లాలు అంటూ ఆకర్షణీయమైన ప్రీలాంచ్ ఆఫర్లతో కొందరు మోసాలకు పాల్పడుతున్నట్లు అధికారులు గుర్తించారు. సరైన అనుమతులు, లేఅవుట్ ఆమోదాలు లేకుండానే ప్రాజెక్టులను ప్రచారం చేసి ముందస్తు డబ్బులు వసూలు చేస్తున్న ఘటనలపై నిఘా పెంచారు. నకిలీ రియల్ ఎస్టేట్ ప్రకటనలపై సైబర్ సెల్ సహకారంతో చర్యలు తీసుకుంటున్నారు. నిబంధనలు ఉల్లంఘించే సంస్థలపై జరిమానాలతో పాటు క్రిమినల్ కేసులు నమోదయ్యే అవకాశం ఉందని హెచ్చరించారు. ప్రజలు సోషల్ మీడియా ప్రకటనలను గుడ్డిగా నమ్మకుండా, పెట్టుబడి పెట్టే ముందు ప్రాజెక్ట్‌కు సంబంధించిన RERA రిజిస్ట్రేషన్ నంబర్, అనుమతులను అధికారిక పోర్టల్‌లో తప్పనిసరిగా తనిఖీ చేసుకోవాలని అధికారులు సూచించారు.
