హైదరాబాద్‌లోని కేబీఆర్‌ పార్క్‌ చుట్టూ ట్రాఫిక్‌ నియంత్రణ కోసం చేపట్టనున్న రీ-డిజైన్‌ ప్రాజెక్టుపై పలు సందేహాలు వ్యక్తమవుతున్నాయి. గతంలో ప్రతిపాదించిన ఏడు ఫ్లైఓవర్లు, ఏడు అండర్‌పాస్‌లకు రూ.1,090 కోట్లుగా అంచనా వేయగా, వాటిని రద్దు చేసి నాగార్జున సర్కిల్‌ నుంచి జూబ్లీహిల్స్‌ చెక్‌పోస్ట్‌ వరకు 4.3 కిలోమీటర్ల ఆరు లేన్ల ఎలివేటెడ్‌ కారిడార్‌ను ప్రతిపాదించారు. అయితే కొత్త ప్రాజెక్టుకూ అదే రూ.1,090 కోట్ల వ్యయాన్ని చూపడంపై విమర్శలు వస్తున్నాయి. కొత్త టెండర్లు లేకుండానే ఇప్పటికే ప్యాకేజీ-1లో పనిచేస్తున్న సంస్థకు పనులు అప్పగించడంపైనా ప్రశ్నలు తలెత్తుతున్నాయి. గత పనుల కోసం చేసిన ఖర్చులు, రోడ్ల తవ్వకాలు, చెట్ల తొలగింపు తదితర అంశాలపై ప్రభుత్వం స్పష్టత ఇవ్వాలని పలువురు కోరుతున్నారు.
