సికింద్రాబాద్ కంటోన్మెంట్‌లోని దశాబ్దాల నాటి వరల్డ్‌ వార్–2 వార్ మెమోరియల్ త్వరలో తరలించనున్నారు. పరేడ్‌ గ్రౌండ్‌ సమీపంలోని జనరల్‌ చౌదరి రోడ్డుపై ఉన్న ఈ చారిత్రక స్మారకాన్ని జిమ్‌ఖానా గ్రౌండ్స్‌ నుంచి శామీర్‌పేట్‌ ఓఆర్‌ఆర్‌ వరకు నిర్మించనున్న ఎలివేటెడ్ కారిడార్ కోసం మార్చాలని నిర్ణయించారు. అక్టోబర్‌ 6న జరిగిన సమావేశంలో సికింద్రాబాద్ కంటోన్మెంట్‌ బోర్డు తరలింపునకు ఆమోదం తెలిపింది. సుమారు 5,800 చదరపు అడుగుల కంటోన్మెంట్‌ భూమిలో ఉన్న ఈ స్మారక చిహ్నం రెండో ప్రపంచ యుద్ధంలో ప్రాణాలు కోల్పోయిన అప్పటి హైదరాబాద్‌ రాష్ట్ర సైనికుల జ్ఞాపకార్థం నిర్మించారు. కొత్త ప్రదేశం ఖరారైన తర్వాత అసలు స్మారకాన్ని తరలించకుండా, ఆధునిక హంగులతో ప్రతిరూపాన్ని నిర్మించే యోచనలో HMDA ఉన్నట్లు సమాచారం.
