అమరావతిలో సుమారు రూ.4,000–5,000 కోట్ల అంచనా వ్యయంతో గ్రీన్‌ఫీల్డ్ అంతర్జాతీయ విమానాశ్రయం నిర్మాణానికి ప్రణాళికలు సిద్ధమవుతున్నాయి. రావెల–తాడికొండ మధ్య ప్రాంతాన్ని ప్రతిపాదిత విమానాశ్రయానికి అనువైన ప్రదేశంగా గుర్తించారు. ఈ ఎయిర్‌పోర్ట్ అందుబాటులోకి వస్తే ప్రవాసాంధ్రులు, విదేశీ విద్యార్థులు, అంతర్జాతీయ పెట్టుబడిదారులకు అమరావతికి నేరుగా చేరుకునే అవకాశం కలుగుతుంది. అంతేకాకుండా ఎయిర్ కార్గో సదుపాయాలతో ఆక్వా ఉత్పత్తులు, గుంటూరు మిర్చి, ఉద్యాన పంటల ఎగుమతులకు ఊతం లభించే అవకాశం ఉంది. ప్రాజెక్ట్‌పై టెక్నో-ఎకనామిక్ ఫీజిబిలిటీ ప్రక్రియను ఏపీ ఎయిర్‌పోర్ట్స్ డెవలప్‌మెంట్ కార్పొరేషన్ ముందుకు తీసుకెళ్తోంది.
