ఆంధ్రప్రదేశ్‌లో మూడు రాజధానుల అంశంపై దాఖలైన పిటిషన్లపై హైకోర్టు కీలక వ్యాఖ్యలు చేసింది. గత ప్రభుత్వం అమరావతితో పాటు విశాఖపట్నం, కర్నూలును రాజధానులుగా చేయడానికి తీసుకొచ్చిన చట్టాలను సవాల్ చేస్తూ పిటిషన్లు దాఖలయ్యాయి. అయితే ఆ చట్టాలను ప్రభుత్వం వెనక్కి తీసుకుంది. ప్రస్తుతం కూటమి ప్రభుత్వం అమరావతిని ఏకైక రాజధానిగా కొనసాగిస్తూ అభివృద్ధి పనులను వేగవంతం చేస్తోంది. ఈ నేపథ్యంలో మూడు రాజధానులపై గతంలో దాఖలైన పిటిషన్లు ఇప్పుడు నిరర్ధకంగా మారే అవకాశం ఉందని హైకోర్టు అభిప్రాయపడింది. సుప్రీంకోర్టులో ఈ అంశంపై సెప్టెంబర్ 29న విచారణ జరగనున్న నేపథ్యంలో, అక్కడి నిర్ణయం ఆధారంగా తదుపరి చర్యలు తీసుకుంటామని హైకోర్టు తెలిపింది. అప్పటివరకు విచారణను వాయిదా వేసింది.
