బెంగళూరులో రియల్ ఎస్టేట్ మార్కెట్ తదుపరి దశలో లొకేషన్ కంటే లివబిలిటీకి ప్రాధాన్యం పెరగనుంది. మెట్రో, టన్నెల్ రోడ్లు వంటి మౌలిక వసతుల విస్తరణతో నగర శివారు ప్రాంతాలకు కనెక్టివిటీ మెరుగవుతోంది. దీంతో కేవలం ఆఫీస్‌కు దగ్గరగా ఉండటం కాకుండా నీటి భద్రత, పచ్చదనం, ట్రాఫిక్, నడకకు అనుకూల వాతావరణం, రోజువారీ అవసరాల సౌకర్యాలు వంటి అంశాలను కొనుగోలుదారులు పరిశీలిస్తున్నారు. బెంగళూరులో పెరుగుతున్న ట్రాఫిక్, నీటి సమస్యలు, తగ్గుతున్న పచ్చదనం నేపథ్యంలో మంచి కమ్యూనిటీ ప్లానింగ్‌కు ప్రాధాన్యం పెరుగుతోంది. భవిష్యత్‌లో సౌకర్యవంతమైన, నీటి భద్రత కలిగిన, పచ్చదనం ఉన్న నివాస ప్రాజెక్టులు రియల్ ఎస్టేట్ మార్కెట్‌లో కీలకంగా మారే అవకాశం ఉందని నిపుణులు చెబుతున్నారు.
