పాత ఇల్లు లేదా ప్రాపర్టీని హోమ్ లోన్‌తో కొనుగోలు చేసేటప్పుడు ధరతో పాటు పలు అంశాలను పరిశీలించాలి. ముందుగా ప్రాపర్టీ టైటిల్, యాజమాన్య హక్కులు, రిజిస్ట్రేషన్, ఎన్‌కంబ్రెన్స్‌లు, ప్రాపర్టీ ట్యాక్స్ రికార్డులను తనిఖీ చేయాలి. నిర్మాణం మంజూరైన ప్లాన్‌కు అనుగుణంగా ఉందో లేదో కూడా చూడాలి. అదనపు అంతస్తులు లేదా అనధికార మార్పులు ఉంటే రుణం పొందడంలో సమస్యలు రావచ్చు. ప్రాపర్టీ వయసుతో పాటు నిర్మాణ నాణ్యత, నిర్వహణ పరిస్థితి, భవిష్యత్ మరమ్మతులు, రీనోవేషన్ ఖర్చులను అంచనా వేయాలి. అలాగే ఆస్తికి బ్యాంకు రుణం లభిస్తుందా, రుణ కాలపరిమితి ఎంత ఉంటుంది అనేది ముందుగానే తెలుసుకోవాలి. అనధికార కాలనీలు, వివాదాస్పద భూములు వంటి వాటిపై ప్రత్యేక జాగ్రత్త అవసరం. చివరగా EMI, నిర్వహణ, మరమ్మతుల ఖర్చులను కలిపి మొత్తం ఆర్థిక భారాన్ని అంచనా వేసిన తర్వాతే కొనుగోలు నిర్ణయం తీసుకోవాలి.
