హైదరాబాద్–శ్రీశైలం ఎలివేటెడ్ కారిడార్ ప్రాజెక్టులో కీలక మార్పులు చోటుచేసుకున్నాయి. నల్లమల అటవీ ప్రాంతంలోని కొండలపై కాకుండా, ప్రస్తుతం ఉన్న రహదారి వెంటే కారిడార్ నిర్మించాలని అధికారులు నిర్ణయించారు. మన్ననూరు నుంచి పాతాళగంగ వరకు సుమారు 55 కిలోమీటర్ల మేర కొత్త అలైన్‌మెంట్ రూపొందించారు. ప్రస్తుతం డీపీఆర్ తయారీ పనులు కొనసాగుతున్నాయి. ట్రాఫిక్ రద్దీపై నిర్వహించిన సర్వేలో భారీ వాహన రాకపోకలు లేవని తేలడంతో, ప్రాథమికంగా కారిడార్‌ను 2-లేన్‌గా నిర్మించాలని నిర్ణయించారు. భవిష్యత్‌లో అవసరాన్ని బట్టి 4-లేన్‌గా విస్తరించేలా డిజైన్ చేస్తున్నారు. ప్రమాదకరమైన హెయిర్‌పిన్ మలుపులను సరిచేసి ప్రయాణాన్ని సులభతరం చేయనున్నారు. అయితే ప్రాజెక్టుకు కేంద్రం నుంచి నిధులు, అనుమతుల ప్రక్రియలో జాప్యంపై రాష్ట్ర ప్రభుత్వం అసంతృప్తి వ్యక్తం చేస్తోంది.